Ecuador tan-in chhunga buaina chhuakah mi 8 an thi

Ecuador-a tan-in pahnih chhungah Ningani zan khan buaina a chhuak a, mi pariat an thih bakah hliam 10 an awm. Buaina chhuahna hmunte hi Cotopaxi No 1 prison, Cotopaxi province leh Pichincha Provisional detention centre, Pichincha province amite an ni.

Thuneitute chuan buaina chhuahna chhan an sawilang lo a, buaina chhuak vangin tan-in pahnihah hian mi pali ve ve an thi tih an sawi. Buaina chhuaka mawhphurtute chu hriat an ni tawh tih sawiin, an rama tan-in zinga venhimna khauh berna, Santa Elena province-a El Encuentro tan-inah sawn an ni dawn tih an sawi bawk. Hei tan-in hi an rama pawikhawihtu leh misual langsar tak takte dahna tura kum 2025-a sak a ni. Ram hectare 37-a zauah sak niin, tang 8,00 - 1,000 nawm thei tura duan a ni. Tan-in hungna hi bang metre 9-a sang siam a ni bakah, guard tower paruk, secdurity perimeter eng emaw zat dah a ni bakah, tangte tlawh dan turah pawh dan khauh tak siam a ni bawk.

Ecuador ramah hian tan-in chhung intihbuaina thleng fo a, kkum 2021 aṭang khan buaina chhuak vangin tang 500 chuang an thi tawh a ni. Tan-inah hi sipaiten venna hnuaiah awm mah se, tan-in chhunga ruihhlo tawlhru pawl mi leh sa tangte chuan thuneitute hi beiin an thunun fo a, tan-in chhunga criminal gang-ten thuneitu nih inchuhin pawl hran hrante an inbei fo bawk. Hei bakah an ram tan-in te hi a tawtin, a awm thei tur zat bithliah aia tam tak dah an ni ṭhin.