Houthi helten Yemen sorkar camp an bei

Yemen-a Iran thlawp helpawl, Houthi ten Shabwa-a government military camp, Al-Alam camp an bei a, mi 73 an thi a, hliam 200 chuang an awm bawk. He hmun hi Yemen security force member tharten training an neihna hmun a ni.

Yemen armed force thupuangtu, Majed al-Nuzaili chuan Houthi helte hian Thawhṭanni khan ballistic pathum hmangin camp hi an bei tih a sawi. Houthi thupuangtu Yahya Saree pawhin an pawl tih ngei a nih thu a sawi ve nghal bawk a, Al-Alam camp chu Saudi Arabia officer-ten an enkawl niin a sawi. Saudi thlawp military base hrang hrangte chu bitum zel an tum tih a sawi bawk.

Shabwa hi Yemen chhim lam, Jadan district-a awm niin oil leh gas field tamna hmun a ni. Yemen rama energy facility lian ber Balhaf liquefied natural gas terminal pawh he bialah hian a awm a ni.

Yemen sorkar hi Saudi Arabia kaihhruai Arab ṭangrual ram chuan thlawpin, Houthi hel nen hian an inbei a ni. Houthi hian drone leh missile hmangin Saudi Arabia ram chhung hmun hrang hrang a bei tel a, Riyadh-a international airport leh state oil company, Aramco hmunte pawh an bei tel a ni. Britain chuan Houthi beihna laka Saudi invenna turin RAF Typhoon fighter jet a tir dawn tih a sawi a, Saudi khawpui hrang hrang leh infrastructure pawimawhte venhimna kawngah an pui dawn tih a sawi a ni.