Putin-a'n Trump leh Xi te nena meeting neih rawt

Russia president Vladimir Putin chuan Ukraine nena indo mekna tihtawp a nih theih dan tur ngaihtuaha, US president Donald Trump leh China president Xi Jinping nena thla thara meeting neih a rawt.

Putin hian he rawtna hi October 9-a Trump nena telephone-a an inbiaknaah khan a sawi chhuak nia tarlan a ni. Russia parliament, Kremlim thupuangtu chuan meeting neih tur chungchang hi ngaihtuah mek a nih thu sawiin, inremna erawh siam a la ni lo tih a sawi. Inbiakna neih tura rawtna siamah hian Ukraine erawh telh a nni lo a, Putin hian a hma pawhin Ukraine president Volodymyr Zelenskyy-a'n inhmuh a rawtna chu a lo hnawlsak zel a ni. Ukraine president nena inbiakna an nei dawn a nih chuan Moscow-ah an nei tur a ni a ti a, hei hi Ukraine lam chuan an hnawl ve leh bawk.

Kremlin chuan ram pathum hruaitute meeting hi November 18-19 a Shenzhen-a Asia-Pacific Economic Cooperation summit neih tur kar lakah neih rawt a nih thu sawi.

President Trump chuan Putin leh Xi Jinping te hmuh a inpeih thu a sawi a, hemi rual hian Ukraine president Zelenskyy chu sawisel nghalin, Ukraine aiawhin mi dangin inbiakna an neih a ngai tawh a ni, a ti. Meeting-ah hian Ukraine bakah nuclear ralthuam tihbona tura chungchang pawh sawi a ngai tih a tarlang bawk.

Hetih lai hian Ukraine foreign miniter Andriy Sybiga chuan Ukraine hruaitu tel loa meeting neih tum chu a sawisel nghal a, meeting hi neih a nih chuan Putin chuan indona titawp loin a chhunzawm phah zel zawk dawn a ni, a ti. Putin chu ram hruaitu ni loin war criminal a ni, tiin a sawi.