2035-ah Beijing-ah kum 60 chunglam tam dawn

China ramah nau piang an tlakhniam zel avangin, kum 2035-ah an ram khawpui, Beijing-a cheng zingah kum 60 chung lam chu hmun thuma ṭhena khum khat an tling tawh dawn a, kum upa tamna 'super-aged' city a ni chho dawn tih Beijing Daily chuan a tarlang.

Nikum kum tawp khan Beiing khawpuiah hian kum 60 chunglam mi mtd 5.29 an awm tling tawh a, hei hi khawpuia cheng hmun lia ṭhena khum khat dawn an ni p ha tawh. City sorkar chuan kum upate enkawl leh puihna tur pawh a duang thar zel a, pension te pawh a tisang tawh a ni. Kum upa lam enkawlna tura sum sen pawh a tam chho tawh hle a ni.

Hun rei tak chhung fa pakhat aia tam neih khapna policy an kalpui avangin China rama nau piang an tlem a, mihring punna pawh a tlahniam zel a ni. Kum 2022 aṭang khan an ram mipui awm zat hi a tlahniamin kum upa lam an pung thung. Hei vang hian sorkar chuan fa pakhat aia tam neih khapna policy pawh titawp tawhin, nau piang an pun theihna tur pawhin hma a la chho a ni. Hnathawk thei rual an tlem chhoh zel avangin an ram economy pawh a nghawng dawn a, hei vang hian thuneitute lam pawhin an ram mipui an pun chhoh leh theihna turin ruahmanna hrang hrang pawh an siam a ni. Hetichung hian kum 2025 khan nau piang thar zat hi a la tlahniam tho a, hemi kuma nau piang thar zat mtd 7.92 an awm laiin, thi zat hi mtd 11.31 an awm thung.