Fund tlem vangin Gaza-a ṭanpuina pek zat titlem

World Food Programme (WFP) chuan Gaza Strip-a chengte hnena ṭanpuina an pek ṭhin chu fund an dawn a tlakhniam zel avangin an titlem tih an sawi. Tun thla aṭangin ṭanpuina an pek ṭhin zinga nuai 5 vel chu an titawp WFP country director, Shaun Hughes chuan a tarlang.

WFP hnen aṭang hian Gaza Strip-a cheng, Palestinian zinga a zahve dawnte chuan ṭanpuina hi thla tin an dawng a, sum leh ei turte pek ṭhin an ni. Mahse, fund an dawn zat a tlakhniam zel avangin ṭanpuina an pek zat, mi mtd 1.6 chu mi mtd 1.1 velah an tlahniam ta a ni. Hei bakah nitin chaw ei tur, ni khata mi 250,000 hnena an sem ṭhin chu mi 150,000 ah tihhniam a ni dawn bawk.

Gaza Strip-a cheng, mi mtd 2.1 dawn zinga a tam zawk hi indona avangin an in leh lo an chhuahsan a, an zinga hmun thuma ṭhena hmuh hnih chu chhawmdawlna ringin an la khawsa a ni. Kumin July thla aṭang khan ṭanpuina sum faia pek ṭhin chu tihtlem a lo ni tawh bawk a ni.

Kumin chhunga atana Palestinian mite chhawmdawlna tura hma an laknaah WPF hian sum mamawh tura ruahman aṭanga a zahve tling lo chauh an la hmu a ni. Agency chuan thla ruk dang lo awm tur atan ṭanpuina pekna tur hian USD mtd 450 vel hmanhmawh taka mamawh a nih thu a sawi.