Pakistan parliament-in Khyber Pakhtunkhaw-a emergency puan thlawp

Pakistan parliament chuan an ram hmar thlang lama awm, Khyber Pakhtunkhaw-a sorkar laipuiin emergency puang a, governor rule hnuaia awm tura a tihna chu a thlawp. He province hi jail-a tang mek, prime minister hlui Imran Khan-a party, Pakistan Tehreek-e-Insaf (PTI) party rorelna a ni.

Ningani khan National Assembly leh Senate joint meeting-ah emergency puan chungchang hi ngaihtuahin pawm a ni. Hetih lai hian eptu pawl member-te chuan an dodal thung a, emergency puan chu pawm a theih a ni lo tih thuziakte an keng lang bawk.

Prime minister Shehbaz Sharif kaihhruai sorkar laipui chuan October 11 khan Khyber Pakhtunkhaw province-ah emergency hi a puang a, provincial sorkar-a chu firfiaka chetna dodal leh beih letna kawngah a inrawlh ve duh lo nin a puh. Hetih lai hian PTI hian Imran Khan jail aṭanga chhuah phutin sorkar an nawr reng a, an thil phut nawrna atan Islamabad khawpui panga kawng zawh pawh an tum a ni. Hei vang hian sorkar laipui hian he province-a PTI sorkar thununna turin emergency hi a puang nia ngaih a ni thung.

Parliament joint sitting neihah parliamentary affairs minister Tariq Fazal Chaudhry chuan emergency puan a nih chungchangah motion hi a pu lut a ni. Vote lak hmain sawi ho a ni a, eptu lam chuan helte thlawp nia province sorkar puhna chu an hnawl. Mahse, interior minister Mohsin Naqvi chuan thu dik tak chu pawm mai turin a ti ve thung a, sorkar chuan emergency puan mai loh chu thlan tur a nei lo niin a sawi.