Pakistan-a school inchung chim vangin mi 28 an thi

Pakistan-a Khyber Pakhtunkhwa province khawpui, Peshawar-a private school pakhat chu nimin khan a chung a chim a, zirlai 27 leh zirtirtu pakhat an thih bakah hliam 40 chuang an awm.

Chhiatna thlenna hmun hi khawpui laili lai, Dir Colony a nih thu Peshawar Capital City Police hotu, Mian Saeed chuan a sawi. Lady Reading Hospital thupuangtu, Muhammad Asim chuan hliam tuarte enkawlna turin damdawi-in emergency puan a ni nghal bawk tih a sawi. In chung chim vanga thi, zirlaite hi kum 13 leh a hnuai lam vek an ni.

Prime minister Shehbaz Sharif chuan chhiatna thleng leh, mi tam takin nunna an chan chu pawi a tih thu sawiin, thi chhungte a tuarpui thu a sawi. Hliamte pawh an dam thuai a duhsak thu a sawi a, damdawi-in lam thuneitute hnenah pawh enkawlna ṭha ber pe tura a hrilh thu a sawi bawk.

Kyber Pakhtunkhwa governor, Faisal Karim Kundi chuan education advisor hnenah he thil thlen dan report kimchang theh lut turin a hriatir thu leh, an province chhunga zirna in hrang hrangte a him dan enfiah vek tur leh, siamṭhat ngai awmte chu rang taka siamṭha nghal tura thupek a tihchhuah thu a sawi. Naupangte himna chu ngaihthah tur a ni lo, a ti.