Inkahhai puan hnuah Russia-in energy site 6 an kap : Zelenskyy

Ukraine president Volodymyr Zelenskyy chuan US president Donald Trump-a'n Russia leh Ukraine-in inkahhai puan an remtih thu a puan hnuah, Russia chuan Ukraine-a energy facility paruk chu a kap leh nghal niin a sawi.

President Trump hian Pathianni khan ram pahnihten inkahhai puan an remti a, he inremna hi hman nghal a nih tur thu a lo sawi tawh a ni. Mahse, he thu a sawi hnu rei vak lohah Russia chuan Ukraine-a gas station, energry infrastructure leh facility dangte a bei chhunzawm leh nghal tho a ni, a ti.

Russia beihna avanga Izyum khawpui power grid a chhiat avangin khawpuia chengte hian power supply nei loin an awm phah a, Ukraine khawthlang lama energy leh railway infrastructure te pawh a cheh tel bawk tih state news agency chuan a tarlang. Ramchhung hmun hrang hranga energy site beihnaah hian mi 33 in hliam an tuar bawk a ni.

Zelenskyy chuan Russia chu an beih ve loh thu sawiin, Russia chetdan chu president Vladimir Putin-a'n president Trump a thusawi a chhan letna a ni, a ti. Hei hi Russia-in energy kaihhnawih lama inkahhai puan a pawm lohzia tilangtu a ni tiin a sawi bawk.