Pakistan-a Imran Khan party rorelna province-ah emergency puang

Pakistan sorkar laipui chuan nimin an rama hmar thlang lama prime minister hlui, Imran Khan-a party, Pakistan Tehreek-e-Insaf (PTI) rorelna province, Khyber Pakhtunkhwa province-ah state of emergency a puang.

State of emergency hi an ram danpuia article pahnih, 232 leh 234 hnuaiah, ram himna kaihhnawih thilah puan a ni. He province-a PTI in thuneihna a chelh mek pawh a tihtawp sak nghal a ni.

President Asif Ali Zardari chuan social media-ah hemi chungchang hi post-in, prime minister Shehbaz Sharif kaihhruaia cabinet meeting-ah emergency puan hi rawt a nih hnuin a pawmpui tih a sawi. PM Office pawhin thuchhuah siamin, Khyber Pakhtunkhwa province dinhmun leh sorkar rorel dante an ngaihtuah ho thu a tarlang bawk. Ram danpui chuan sorkar laipui chu state of emergency puanna province-a thuneihna chu a kenkawh a phalsak a, hetih lai hian President chuan Khyber Pakhtunkhwa-a inrelbawlna kalpui dan tur erawh a la sawichiang lo.

PTI hi jail-a tang mek, PM hlui Imran Khan chhuah zalen phutin an ram khawpui, Islamabad pana kawng zawh tumin an inbuatsaih mek a ni. Khyber Pakhtunkhwa-ah hian Khan thlawptute hian lungawi lohna an lo lantir fo tawh bawk a ni.