South Korea-in Ukraine-a a palai ko haw

Ukraine-in South Korea nena prisoner of war chungchanga an inremna siam a bawhchhiat avanga lungawi lohna kal zelah, South Korea chuan Ukraine-a an ram palai chu an ko haw dawn tih a sawi.

Russia-Ukraine indonaa Russia sipaite pui tur tirh, North Korea sipai zinga chu Ukraine hian an man a, an sipai mante hi South Korea-ah an thawn tih Ukraine president Volodymyr Zelenskyy chuan a sawi a ni. A thusawi hian South Korea a tilawm lo hle a, prisoner of war chungchang chu thuruk, puanzar loh tura inremna an siam thu sawiin, sawi chhuah a nih avang hian an lungawi loh thu pawh Ukraine thuneitute hnenan an thlen tawh bawk.

Hetih lai hian Zelenskyy office lam chuan puanzar loh tur tia inremna siam a awm lo niin a sawi ve thung. Mahse, South Korea foreign minister Cho Hyun chuan tun kar tir lam khan Ukraine foreign ministry aṭangin thupha chawikan an dawn thu a sawi a, an thupha chawi dan erawhin an beisei a pha lo hle tih a sawi. South Korea chuan Ukraine lam nen inbe chhunzawmin, an inhriathiam lohna hrang hrang pawh ṭha taka chinfel theih an beisei thu an lo sawi tawh a ni.

President Zelenskyy hian September thlaa UN General Assembly-a thu a sawiah, North Korea sipai pahnih an man thu leh,thil awlsam tak a nih loh thu sawiin, heng sipai pahnihte South Korea ramah thawn an ni tih a sawi a ni. Hei hi South Korea president Lee Jae Myung chuan sawiselin, Zelenskyy thusawi chuan a tilawm lo hle tih a sawi a, North Korea sipai thawn an nih chungchang sawi chhuah chu fimkhur ngai tak, an ram security thlenga nghawng thei a ni tih a sawi. He thil vang hian president Lee hian an ramah sawisel a hlawh phah a, North Korea ram tihlawm a tum avanga sipai thawn an nih chungchang pawh zep tumah an puh a ni. Mahse President office chuan hei hi sipai chhungte venhimna atana zep ngai a nih thu sawiin, Ukraine ngei pawhin puanzar loh a remti niin an tarlang.