Ukraine-in sipai indaih lohna tawk chho mek

Ukraine leh Russia indona thleng mek chu a kum ngana a ni tawh a, Ukraine chuan drone technology leh tactic lamah hma sawn viau mah se indona hmuna che chhuak tur sipai indaih lohna a tawk chho tawh a ni.

Ukraine hian a hma aṭangin Russia aiin sipai a nei tlem zawk sa reng a, kum nga chhung an indo tawh avangin sipai indaih lohn hi a zual chho tawh hle tih thuneitute chuan an sawi. Sipai unit ṭhenkhat phei chu awm thei tur zat chanve vel an tling ṭawk chauh tawh a ni.

Drone hman dan thar leh thiamna thar hmanga Ukraine-in hnehna an chan theihna tur pawh sipai lamin an indaih lo niin an sawi. "Hmanrua kan neih leh mihring zat kan neih aṭang hian, tunah hian kan awmna hmun chin chauh hi kan humzui thei a ni," tiin Ukraine khawchhak lam Pokrovsk biala Da Vinci Wolves battalion deputy commander chuan a sawi. Hemi hmun hi Russia ho beihpui thlakna hmun ber a ni. Hma an lak belh zel chuan an sipai an hloh belh zel dawn niin a sawi.