France-a zirlaite nawrh huaihawtah mi nuai 2.6 chuang tel

France rama zirlaiten zirtirtu indaih lohna chinfel a, education fund tam zawk pek phuta nawrh an huaihawt mekah, Thawhlehni khan ram chhung hmun hrang hrangah rally neih a ni a, rally neihnaah tel hi mi nuai 2.6 an tling.

Paris, Marseille, Strasbourg leh khawpui dangah zirlai tam tak pungkhawmin, school an dang a, thuziakte an an keng bawk a ni. Zirlaite thlawpna lantirin zirtirtute bakah mi dang tam takin kawngzawh hi an zawm a ni. Interior Ministry chuan Paris khawpui bika pungkhawm hi 56,000 an tling niin an sawi. Nawrh huaihawt vang hian Thawlehni khan high school 1,800 khar a nih thu High School Students Union chuan a sawi.

Nawrh huaihawtna hmun ṭhenkahta pungkhawmte leh police-te an innawr buai a, pungkhawm zinga mi 500 vel man an ni. Police-te chuan mipui hnawhdarh nan tear gas leh hmanraw dangte an hmang a, hei hi nu leh pa leh zirtirtute chuan an sawisel nasa hle. Zirlai pawl ṭhenkhat chuan vawiin hian nawr huaihawt chhunzawm leh an tum.

France prime minister Sebastien Lecornu chuan sorkar leh zirlai pawl hruaitute chuan zirlaite harsatna tawh hrang hrangte chu ngaihtuah ho a, a chinfel dan an ngaihtuah a ngai a ni, a ti. Zirlai nawrh huaihawtte laka police-te chet dan sawisel awmte chu chhui chian a ni dawn tih a sawi a, hemi rual hian police-te chetdanah inthliarna nasa tak a awm nia sawi chu dawt a nih thu a sawi. Sorakr chuan school building thuam ṭhat ngaite a endik dawn a, hei bakah zirlaite thil phut zirtirtu indaih lohna chinfel turin zirtirtu an hnaa kal ṭha lote thlak a, school day zing dar 8 - zan dar 6 thleng ni ṭhin titawi tura ngenna pawh ennawn a tiam.