Myanmar President-in Malaysia a tlawh

Myanmar president Min Aung Hlaing chu ni hnih cham turin nimin khan Malaysia-ah a zin a, Malaysia hruaitute nena Myanmar mi raltlan awm mekte hruai kir an nih dan tur chungchang an sawi dawn a ni.

Malaysia prime minister Anwar Ibrahim chuan an rama Myanmar raltlan awm mek zinga mi 5,000 vel hruai kir an dan dan tur chungchang ngaihtuah inbiakna nei turin Min Aung Hlaing hi zin turin a sawm a ni. Anwar hi an rama Myanma raltlan tam lutuk chuan khawtlang inrelbawlna, sum leh security lam thlengin harsatna a thlen nia sawiin, an zinga mi 5,000 chu thawn kir a lo tiam tawh a ni. Anwar chuan raltlante chu tiam chin awm loin an lo thleng reng thei lo tiin, Myanmar sorkar chuan a mi leh sa lakah mawhphurhna la a, a ngaihve a ṭul a ni, a ti.

Pathianni khan lawng hmagin mi 1,500 chu Myanmar-ah thawn kir an lo ni tawh a, a bak mi 1,500 vel thawn kir dan pawh ruahman a ni tih an sawi. Raltlan thawn kir zingah hian Rohingya an tel leh tel loh erawh tarlan a ni lo. Hetih hian Malaysia-a Myanmar mi raltlan zingah Rohingya hi an tam ber niin UN data chuan a tarlang.

Malaysia Foreign Ministry chuan Myanmar President hi an rama dan loa Myanmar mi awmte him taka thawn kir an nih dan tur sawipui a ni dawn tih a sawi. An rama immigration detention centre hrang hrangah August thla tawp thleng khan Myanmar mi awm hi 11,804 an tling niin a sawi.