Turkey leh Pakistan-in Saudi Arabia-ah sipai thawn remti

Yemen-a Iran thlawp helpawl, Houthi-ten Saudi Arabia an beih chhunzawm zel avangin, Turkey leh Pakistan chuan Saudi Arabia nena ram pathumten defence lama inremna an lo siam tawh hnuaiah, Houthi bei let tura Saudi-a an sipaite thawn luh an remti.

Thawhṭanni khan Riyadh-ah ram pathum defence leh foreign minister-te chuan meeting an nei a, thutlukna hi an siam a ni. Ram pathumten venhimna lama thawh hona tura inremna an siam, Mecca Alliance for Defence tia sawi hi August 7 khan a ziak fel a ni. Inremna an siamah hian ram pathum zinga a tupawhin beih a tawk a nih chuan, an vaia beihna anga ngaih a ni ang tiin an sawi.

Saudia Arabia defence minister, Khalid bin Salman chuan committee chuan defence lama thawh hona tur thuthlung an siam chu a taka kalpui a, an ram beitute chhan letna tura hma lak a remti a ni, a ti. Pakistan Foreign Ministry pawhin thuchhuah siam nghalin, Saudi Arabia-a sipai thawn luh tur chu rang taka kalpui a ni dawn tih a sawi bawk.

Mecca Defence Alliance ziaktu ram pathumte sipai neih zat hi belhkhawmin mtd 1.4 vel a tling a, military aircraft 3,400, tank 6,000 leh naval asset 340 chuang an nei tling bawk.

Houthi helpawl hian Saudia Arabia khawpuia King Khalid International airport leh tuipui kama Aramco refinery an kap fuh leh niin an sawi. Hei bakah Saudi ram chhung hmun eng emaw zat an kap tawh tih sawiin, heng zingah hian airport bakah airbase leh hmun pawimawh tak takte a tel a ni, an ti. Mahse, Houthi thil sawi hi Saudi lam chuan a la nemngheht lo.

Hetih laiin Saudi kaihhruai Arab ṭangrual ramte thlawp, Yemen sorkar sipaite chuan Houthi kut aṭangin Red Sea bula lawngchawlh hmun khawpui pawimawh, Mocha chu an la let tih an sawi. Bab al-Mandeb strait chu an thununna hnuaiah a awm tawh tih an tarlang.