New York-a sentut hri leng vangin emergency puang

US-a New York khawpuiah sentut hri leng vangin governor Kathy Hochul chuan Thawhṭanni kan state pumah disaster emergency a puang a, November 4 thleng a awh ang. Kumina state chhunga sentut vei hi mi 108 hmuh chhuah an ni tawh.

Governor chuan July 15 aṭang khan New York county 18-ah sentut vei report an awm thu sawiin, Pennsylvani-ah case 977 awmin New York ramri rural county-ah hri kai eng emaw zat an awm bawk tih a sawi. Kum 2025 aṭang khan hri kai vei an pung chho a ni.

State sorkar chuan emergency puan chhung hian rural area-ah hri kai an pun avangin health lama thawktute chu measles-mumps-rubella (MMR) vaccine chak zawka pek hna kalpui turin a ti. Hochul chuan vaccine hmanga ven theih natna hri vang hian tumah an thi tur a ni lo, a ti. Nurse-te chu sentut hri vei nia rinhlelhte chu test-na tur order pe chhuak tura phalna pek an ni a, pharmacist-ten naupang kum hnih thleng vaccine an pe thei dawn bawk ani. MMR vaccine pekte chu darkar 72 chhungin state sorkar emaw, New York City immunization centre-ah emaw report zel tura tih an ni. Vaccine pek dawn hian damlo emaw, an legal guardian emaw remtihna lak a ngai thung.

US-ah hian kum 1991 hnua sentut hri kai an tam ber ṭum a thleng mek a, ram pumah a vei mi 3,900 vel hmuh chhuah an ni tawh niin Centers for Disease Control and Prevention chuan a tarlang.