Iran Oil Minister a bang

Iran state media chuan Pathianni khan an ram oil minister Mohsen Paknejad a bang a, acting miniter atan sorkar hnuaia National Iran Oil Company chief executive, Hamid Bovard ruat nghal a nih thu a sawi. Minister banna chhan hi sawilan a ni lo.

Mohsen Paknejad hi kum 2024 August thla aṭang khan oil minister hna a chelh a, Iran leh US indoin an ram economy thlenga a nghawng buai mek laiin minister a nihna aṭang hian a bang a ni. Official chuan a hma deuh aṭangin Paknejad hian a mimal thil avanga ban a tum tawh thu sawiin, president Maasoud Pezeshkian chuan thawh chhunzawm rih turin a ngen a, hemi hnu Pathianni khan a banna hi a pawmsak leh ta niin a sawi.

US-Iran war hian hian oil leh gas siam chhuah leh thawn chhuah lam pawh a nghawng nasa hle. August thla khan Paknejad chuan indona avanga infrastructure tam tak tihchhiah a nih hnuah, an ramin gas a siam chhuah chu cubic meter mtd 95 vel a hloh tawh niin a sawi a ni. Hei vang hian oil thawn chhuah lamah harsatna an tawk a, oil aṭanga an sum lak luh pawh a tlahniam hle bawk.

Acting minister atana rua, Bovard hi kum 62 mi niin, kum 2024 aṭang khan NIOC hotuah a awm tawh a, a hmain National Iranian South Oil Company leh Iranian Offshore Oil Company te pawh a lo enkawl tawh a ni. Oil minister nghet tur ruat a nih hma chu oil ministry hi a lo enkawl rih dawn a ni.