Zirlaite nawrh huaihawt vangin France-a school tam tak khar

France rama zirlaiten nawrh vangin nimin khan an ram chhunga school 500 vel khar a ni tih education minister Eduoard Geffray chuan an sawi. Vawiinah nawrh hi chhunzawm an tum a ni.

High school zirlaite hian zirtirtu indaih lohna tihreh tura substitute teacher tam zawk chhawr, zirna leh facility ṭha zawk leh zirna in hrang hranga mamawhte pe tura phutin an nawrh huaihawt a ni. Zirlaite hian September 17 aṭang khan Paris-ah lungawi lohna hi lantir ṭanin, nawrh an huaihawtnaah hian tharum thawhnate a thleng a, school 24 chu hal leh suasam a ni tawh tih Minister chuan a sawi bawk.

Nawrh huaihawt a nih aṭangin mi 5,000 chuang man an ni tawh a, an zinga 85% chu kum tling lo an ni. Zirlaite hian zirtirtu kal ṭha lo tam ṭhin vang te, school day rei lutuk te, facility ṭha tawk lo leh harsatna dang awm ṭhinte chuan an zirna a tichhia niin an sawi.

ṭPrime minister Sebastien Lecornu chuan Pathianni khan tualchhung thuneitute hnenah zirtirtu kal lo rei tawhte thlaktu tur leh, zirtirtu post ruak hnawhkhah loa awmte hnawhkhah chu ngai pawimawh hmasa turin a chah. Vawiin hian ram chhunga school building ṭha tawk lo awm tam tak chungchang ngaihtuah turin regional president-te nen meeting an nei dawn bawk a ni.

Amnesty France branch chuan zirlai nawrh huaihawtte laka police-te chet dan sawiselin, an thil phutte sawi chhuak leh lantir phalsak an ni tur a ni, a ti. Amnesty France president Anne Savinel-Barras chuan thuneitute chuan naupangte chuan tear gas leh thil danga beih let an nih hlauthawng loin, an dikna chanvo an lantir an phalsak tur a ni tiin a sawi. Mahse, interior minister Laurent Nunez chuan security force-ten zirlaite an bei let lo tih sawiin, an venghim zawk a ni a ti thung.