Brazil President thar tur thlang

Brazil mipuite chuan an ram president thar tur thlangin nimin khan vote an thlak. Candidate 12 an awm a, president nilai Luiz Inacio Luloa da Silva leh president hlui, Jair Bolsonaro-a fapa, senator Flavio Bolsonaro te chu inbei ber tura ngaih an ni.

President candidate zingah vcote thla aṭanga 50% hmu tling an awm lo a nih chuan, vote hmu sang pahnihten inthlan thawh hnihna an hmachhawn leh a ngai ang. Inthlan thawh hnihna neih a ngai a nih chuan October 25-a neih tura ruahman sa a ni.

President nilai, Lula hi kum 80 mi niin khawvela ram hruaitu ni thei upa ber zingah a tel mek a, Brazil president inthlan a chuh vawi sarihna a ni bawk. Bolsonaro hi kum 45 mi niin, president thlannaa a chuh vawi khatna a ni. A pa, Jair Bolsonaro hi kum 2019-2022 chhung khan president a ni a, kum 2024 inthlana a chak zawh loh hnuah sorkar thar paihthlak tum puhna hrang hrangah thiam loh chantir a ni a, kum 27 tang tura hrem niin hun eng emaw chen jail-ah dah a nih hnuah, tunah hian pawn chhuak thei loin a inah hren mek a ni.

Brazil President hi kum li danah thlan ṭhin a ni a, nimina president thar tur thlan rual hian state leh federal representative bakah governor leh senator turte thlan a ni bawk. Vote nei mi mtd 160 vel awmin, vote thlakna atan electronic voting machine hman a ni. Kum 1990 chho aṭangin EVM hi an hmang a ni. Inthlan result hi vote thlak theih hun a tawp aṭanga darkar rei lote hnuah puan theih beisei a ni bawk.