Germany Chancellor-in Ukraine khawpui a tlawh

Germany chancellor Friedrich Merz chu nimin khan puangzar lawk loin Ukraine khawpui, Kyiv-ah a zin. Kyiv a thlen hnuah Merz chuan Russia-Ukraine indona thleng mekah, Ukraine an thlawpna lantira zin a nih thu a sawi.

Tun hnaiah Russia-in missile leh drone hmangin Ukraine a bei ngawrh leh hle a, thlasik a hnaih chhoh mek karah an energy sector lam a bitum nasa zual a ni. Merz chuan, Russia-in Ukraine a beihna chu a chhunzawm zel a nih chuan, he indona hian an ram pawh a nghawng thei dawn tih a sawi a ni.

Ukraine foreign minister Andriy Sybiga chuan Merz hi a lo dawngsawng a, Ukraine leh Germany chuan inzawmna nghet tak an neih thu leh, inlaichinna thuk zawk siam zel an tum thu X-ah a tarlang.

Germany Chancellor hian NATO leh Europe ramte an inlungrual a ṭul thu a sawi a, Ukraine hruaitute hnenah pawh an chunga rinna nghat ngam tura a hrilh tur thu a sawi bawk. Hetih lai hian Russia chuan ram dang hruaitu leh palaite chu Kyiv khawpui tlawh lo turin a lo vau lawk thung a, airstrike an neih leh tur thu pawh an sawi bawk. Russia Foreign Ministry chuan nghawng ṭha lo a awm a nih pawhin, an warning pek pawisa lote mawhphurhna a ni ang, tiin a sawi.

Kumin May thla khan Russia chuan ram dangte chu Ukraine tlawh lo turin warning a lo pe tawh bawk a; mahse, Ukraine thlawptu ramte chuan hei hi ngai pawimawh loin an tlawh chhunzawm reng tho a ni.