Japan-in national intelligence agency din dawn

Japan prime minister Sanae Takaichi chuan a kaihhruai sorkarin an ram pum huap 'national intelligence strategy' hmasa ber a duang chhuak dawn tih a puang. Hei hian US-a Central Intelligence Agency (CIA) kalhmang zuiin, Japan ram tan ram pawn lam thlithlaitu tur agency dinna a thlen theih beisei a ni. He thutlukna hi Japan-a rorel lai, Liberal Democratic Party (LDP)-in ram pawn lam intelligence agency din tura rawtna an lo siam tawh zulzuia siam a ni.

PM Takaichi chuan an ram leh mipui himna turin an intelligence lam chu an thuam chak a ṭul thu a sawi. Thutlukna an siam thar a puan hma hian, Takaichi chuan sorkarin intelligence sector lam thuam tharna tur kaihhruaina a tihchhuah tur thu a lo sawi tawh bawk.

Ram dang thiltithei tak tak - US, Russia leh China-ten Japan ram hi intelligence operation tihna atan an hmang nasa nia sawi a awm a, hei vang hian Japan in a intelligene network thuam chak a mamawhna a zual hle. LDP sorkar hian an intelligence network theihna hi tihchangtlun leh thuam chak a ṭul thu a sawi fo a ni. PM hoin expert panel ten sawi hoin, ruahmanna an siam hma hian mipui ngaihdan bakah ram pawn lama mithiamte pawh an la bawk.