SKorea President-in Ukraine a vau

South Korea president Lee Jae Myung chuan Ukraine-in North Korea sipai pahnih a man, South Korea-a a thawn chungchang a sawi chhuah avangin Ukraine chu ngaihdamdil turin a phut a, ngaihdam an dil lo a nih chuan action an la dawn tiha sawi.

Kar liam ta khan Ukraine president Volodymyr Zelenskyy chuan UN general assembly-ah North Korea sipai pahnih an mante South Korea-ah an thawn thu hi a sawi chhuak a, hei hian South Korea a ti thinur hle. Prisoner of war thawn an nih dan hi puanzar loh a, thuruk ni tura inremna pawh siam a nih thu a sawi a ni.

Ukraine foreign minister Andrii Sybiha chuan thil hriattiam tawk lohna awm vanga he thil hi thleng a ni tiin, a chinfel dan an ngaihtuah mek thu a sawi. Mahse,Lee chuan an insawithiam tumna hi a pawm lo tih sawiin, Korea mipui leh ram zahawmna thlengin a nghawng a ni, a ti.

President Lee office hian sipai thawn a nih chungchang hi Ukraine zawkin thuruk ni tura a ngen thu a lo sawi tawh a, hei hi North Korea sipai chhungte venhimna tura tih a nih tel thu a sawi. Mahse, Zelenskyy office chuan ram pahnihte hian sipai thawn an nih chungchang thuruk ni tura inremna siam a nih loh thu a sawi ve leh thung a, hei hian an inkar boruak pawh a tihchhiat phah a ni.

Zelenskyy-a'n South Korea-a North Korea sipai an thawn tih a sawi chhuah vangin president Lee hian an rama eptu papwlte sawisel pawh a tawk nasa hle. North Korea tihlungawi loh a hlauh vanga zepah an puh.