SKorea-in thupha chawi turin NKorea a phut

South Korea sipaite chuan North Korea nena an inrinaa North Korea-in chilpuah bomb a kam puak chungchangah North Korea chu thupha chawi turin an phut.

September 21 khan Korea ram pahnihte inrina, Demilitarised Zone (DMZ) a chilpuah bomb puak vangin South Korea mi pathumin hliam an tuar a ni. South Korea chuan bomb hi an ram chin lamah a puak tih sawiin, North Korea tih ngei nia a lan thu an sawi. Hei hi ramri chungchanga Korea ram pahnihte kum tam tak chhung inremna an lo siam tawh bawhchhiatna a ni tiin,North Korea thiltih avang hian a ṭul anga hma an lak ve ngei tur thu an tarlang a ni.

North Korea chuan bomb chu an tihpuah a nih loh thu sawiin, South Korea chuan an inkar boruak tichhe zual tura awmze nei loin a puh niin a sawi ve thung. North Korea ram hotu, Kim Jong-un a farnu, Kim Yo Jong chuan an ṭhenawm ram chu dawt phuahchawpah a puh a, ramri kanin North Korea chuan South Korea ramah chilpuah bomb a kam lo tih a sawi. Dik lo taka an puhna man tel tura inbuatsaih turin South Korea ram chu a vau zui bawk.