Pope in AI thil thlen theihte ngaihtuah uluk a ngai tih sawi

Pope Leo XIV chuan Artificial Intelligence (AI) in a pawi zawnga thil a thlen a, thil a tichhiat theih dante chu uluk taka ngaihtuah a ngai tih a sawi. AI lama mithiamten venhimna lam ngaihtuah tel ngai an tih chu sawi ho leh bawhzui zel a ngai a ni, a ti.

Metz, France aṭanga Italy pana a thlawh chhuah hmaa chanchinthar lakhawmtuten an kawmnaah Pope chuan he thu hi a sawi a ni. "Engmah thleng lo tur ang maia hahdam taka lo awm mai mai theih a ni lo. Kan ngaihtuaha kan sawi ho a ngai a ni," tiin a sawi.

AI company liante chuan venhimna lama ruahmanna siamten an umphak theihna turin, AI tihmasawn chak lutuk chu muang zawka kalpui a ngai nia an hriat thute an lo sawi tawh a ni. Anthropic CEO Dario Amodei chuan thla 6- 12 chhungin AI hi agent hrang hrang kaltlangin,internet pumpui thunun thei dinhmun a thleng mai thei tih pawh a lo sawi lawk tawh bawk. Hengte avang hian political leader, AI lam mithiam, social organization leh pawl dang hrang hrangte pawhin AI in thil a thlente leh, thil dang a thlen theihte ngaihtuah ho a ngai tih Pope chuan a sawi.