DR Congo-ah Ebola hri kai 8,000 chuang tawh

Democratic Republic of the Congo sorkar data thar bera a lan danin, an rama Ebola hri kai zat chu mi 8,000 an chuang tawh a, mi 4,000 dawnin an thihpui tawh bawk.

Public health institute chuan Thawhṭanni khan report tichhuakin, hri kai zat 8,607 leh thihpui zat 3,901 an awm tawh tih a tarlang. Hri kai thihpui zat hi 48.4% a tling a ni.

May 15 khan Ebola hri a len thu hi puan a ni a, hri darh tur venna atana sorkarin ruahmanna a siamte chu mipuiin ring loin an lungawi lo hle a, hei hian hna thawhna kawngah harsatna a thlen phah a ni. Rorellai, UDPS party senior member pakhat chu radio-a hri leng mek chungchang leh a hlauhawmdante sawi a, a invenna dan tur a sawifiah hnuah Pathianni khan Ebola hri len nasatna, North Kivu province-a Butembo khuaah mipuiten beiin an vaw hlum niin an sawi.

DR Congo-ah hian Ebola hri a len vawi 17-na a ni a, tuna leng mek hi Bundibugyo strain niin a vaccine emaw enkawlna tur damdawi emaw official-a pawm a la awm lo. Hei vang hian damdawi leh vaccine te pawh enchhin mek a la ni.

World Health Organisation chuan hri leng hi a la ziaawm lo hle tih sawiin, kkum 2014-2016 a West Africa-a Ebola hri leng ai khan a nasa thei dawn niin a tarlang. Hemi ṭuma hri leng vang hian Guinea, Liberia leh Sierra Leone-ah mi 11,000 chuang an thi a ni.

US chuan kar liam ta khan Ebola hri leng do letna tura hmalakna atan USD mtd 267 a pe chhuak a, ram dangte pawhin hri dona atan sum mamawh, USD tld 2 target siam chu tlin a nih theihna atan ṭanpuina sum an pek chhuah a beisei thu a sawi bawk.

DR Congo ram health infrastructure ṭha tawk lo, hri leng hluarna hmun tlawhpawh harsa leh an ṭhenawm ram, South Sudan, Uganda leh Rwanda ramri bula buaina chhuak rengte chuan hri darh tur venna leh, a hri kaite rang taka hriatchhuah leh enkawl an nihna turah harsatna a thlen nasa niin zirchiangtute chuan an sawi. Hei vang hian sorkarin invenna tura ruahmanna a siamte pawh mipui lamin an ngaihven tawk lo a ni.