Iran war tawp leh tawp loh chu US kut a ni : Iran President

Iran president Masoud Pezeshkian chuan, US leh Iran ram indona thleng mek tihtawp a nih leh nih loh chu US kutah a awm tih a sawi.

Ningani zana TV-an an kawmna tihchhuahah, Pezeshkian chuan Iran war chu chhunzawm zel an duh lo a, mahse America chuan indona tihtawp a nih leh nih loh chungchangah duh a thlan a ngai a ni, a ti. Nilaini khan UN General Assembly-ah thu sawiin, US nawrna avanga Iran chu a tlawm mai loh tur thu a lo sawi tawh thung.

US president Donald Trump chuan indona tihtawpna tura inremna an siam thei lo a nih chuan, US chuan Iran chu a nuaibo vek thei a ni a ti a, hemi rual hain inremna siam thuai theih erawh a beisei thu a sawi.

Kumin February 28-a US leh Israel-in Iran-a beihpui an thlak hnuah, Iran hian Israel leh Middle East rama US military bas awmna te chu a bei zui nghal a ni. Iran-in tui kawng pawimawh, Strait of Hormuz a khar zui bawk a, hei hian khawvel huapin energy leh oil supply lamah harsatna a thlen zui a ni. Indona tihtawp a nih theihna turin US leh Iran aiawhte chuan inbiakna nei tawh ṭhin mah se, tun thlengin inremna tluantling an la siam thei lo.