Japan-in ram dang mi chengte tan dan khauh zawk siam dawn

Japan sorkar chuan an rama ram dang mi pem lut, khawsa nghette tan dan khauh zawk siam a tum. Japan mipui nawlpui zingah ram dang mi pem lut pung zel ngaimawhna a lian chhoh zel avangin dan hi siamṭhat an tum a ni.

Dan thar hi October 1 aṭanga hman tum a ni a, he dan hnuaiah hian Japan rama awm ngheh tumte chuan an chhungkua kum khat sum lak luh chu chawhruala Japan mite kum khata sum lak luh aiin a tam zawk tih finfiahna an neih tel a ngai dawn a ni. Hei bakah Japan ṭawng pawh an thiam ṭha tura tih a ni bawk.

Immigration Services Agency chuan dan siam danglam a nih chungchanagah thuchhuah siamin, ram dang mi chengte chuan midang puih ngai loin an khawsa thei tur a ni a, mi dang tana phurrit thlen loa ngelnghet taka awm thei tur an ni tih pawh an dilnaah an lantir a ngai a ni.

Ram dangte nena khaikhin chuan Japan-ah hian ram dang cheng an la tlem hle a, mahse, tun hnaiah an pung chho a ni. Sorkar data-a a lan danin, kum 2025-ah khan ram dang mi khawsa hi an ram mipui zat aṭanga 3% vel an ni a, kum 2070-ah chuan 10% an tling chho turin an chhut. Hetih laiin Japan ramah nau piang an tlem zel avangin, kum 2025 January leh kumin January thla chhunga Japan mi awm zat hi nuai 9 dawnin an tlahniam thung.

Mihring awm zat a tlakhniam zel avangin hnathawk thei rual pawh an tlem zel a, hnathawktu tura ram dang mi mamawhna a sang zel a ni. Hetih lai hian ram mipui zingah ram dang mi pem lut pung zel ngaihmawhna a nasa zel thung a, mipui gaihdan lakah kum 2024-ah ram dang mi tam zawk lak luh duh loh 35.6% an awm laiin, survey hnuhung berah chuan 56.3% ah an pung a ni. Anti-immigration party, Sanseito party pawh a lar chho hle a, Parliament lower house inthlan neih hnuhnung berah pawh seat 15 lain, party mala seat la hnem pathumna a ni pha tawh a ni.