Indonesia-ah meikhu nasa vangin mi nuai chuangin harsatna tawk

Indonesia ramah August thla aṭang khan ram kang avanga meikhu nasa tak a chhuah chhunzawm reng avangin, mi nuai 1.75 velin thawkna lamah harsatna an tawk tih official-te chuan an sawi.

Harsatna tawk zinga mi 40,000 vel chuan khuh nasa tak bakah bronchitis leh pneumonia te an nei a, an zingah nausen eng emaw zat an tel bawk.

Ram kang khu hian ram chhung hmun hrang hrang bakah an ṭhenawm ram, Malaysia leh Singapore thlengin a tuam nasa hle a, air quality pawh a chhiat phah hle.

Borneo leh Sumatra thliarkara ram kang ṭhelh turin Indonesia chuan official 54,000 leh thlawhtheihna eng emaw zat a tir a, mahse kangmei chhuahna hi a zau tham avangin ṭhelh mih pawh a harsa hle a ni. Cabinet secretary Teddy Indra Wijaya chuan boruak leh lei lam aṭangin an theih dan ang anga ṭjhelh hna an thawh thu leh, meikhu nasa tak pawh tihziaawm nih theihna tura theihtawp an chhuah thu a sawi. Indonesia ramah hian kumtin ṭhal lain ram kang hi a thleng fo a, kuinah hian khua a ro zual avangin kangmei chhuak hi kumdang aiin a nasa nia sawi a ni.

Forest monitoring platform Nusantara Atlas chuan nimin thleng khan Indonesia ramah kangmei chhuahna hi hmun 734,000 a awm tawh a, kum 2019 aiin 30% in a tam zawk. January thla aṭang khan ram hectare 895,657 a kang tawh bawk. Ram kang vang hian zirna in te pawh khar a nih phah a, harsatna tawk damdawi-in hrang hranga lut pawh an pun pha hle bawk.

Meikhu nasa tak hi mihring chauh ni loin, ramsa te apwhin an tuar bawk. Ramsa mang mai hlauhawm tawh, organutan pawhin meikhu nasa vang hian harsatna an tawk tih an tarlang. West Kalimantan-a indigenous leh civil society group-te chuan sorkar laipui leh tualchhung thuneitute lakah complaint theh lutin, an province-a ram kang nasa tak thleng thunun thei lohah an puh a, hetiang harsatna hi kumtin an tuar tih an tarlang.