Pakistan PM hlui Imran Khan-a farnu hreng

Pakistan thuneitute chuan Pathianni khan an ram prime minister hlui, Imran Khan-a farnu, Aleema Khan chu Lahore-ah an hreng a, a hnuah Kot Lakhpat jail-ah an dah.

Jail-a tang mek, Imran Khan party, Pakistan Tehreek-e-Insaf (PTI) hian jail aṭanga Khan chhuah tir tura phutin September 27 hian ram pumah nawrh huaihawt an tum a, nawrh huaihawt hmain Aleema Khan hi sorkar chuan Punjab Maintenance of Public Order Ordinance, 1960 hnuaiah a hreng a ni. He dan hmang hian police-te chuan vantlang himna tiderthawng thei anga ngaihte chu an hreng thei a, Lahore deputy commissioner Muhammad Ali Ijaz chuan ni 30 chhung hren turin thupek a tichhuak a ni.

Imran Khan-a farnu dang, Noreen Niazi chuan Aleema hi a in a chhuahsan dawnin police-te hian an la tih a sawi. PTI central information secretary Sheikh Waqas Akram chuan Aleema hren chu a ni chu a dem thu leh, court-ah inlan tir nghal tura a phut thu a sawi bawk. 'A nuṭapa tana a ṭawng chhuah vang ringawt a farnu chu hrem a ni," a ti. Punjab Maintenance of Public Order Ordinance hnuaia hrente hian High Court-ah an khing leh thei tih a sawi bawk.