Chile President hluiin UN hotu chuh tumna hnukdawk

Chile president hlui Michelle Bachelet chuan United Nations secretary-general thar thlan tura chuh a tumna chu hnukdawk.

Kum 74 mi, Bachelet-i hian Inrinni khan video tichhuakin,UN hotu dinhmun chuh a tumna chu a titawp tih a sawi. A thutlukna siamah chuan a inchhir loh thu sawiin, a tan a la hun rih lo nia a ngaih thu a awi.

UN Security Council chuan kar liam ta Zirtawpni khan UN hotu thar tur chuh tumte chungchanga ngaihdan a lak hnuhnung ber tichhuakin, Bachelet-i hian thlawptu vote khat chauh hmuin, thlawp lotu lamah vote 11 a tla, ngaihdan nei lo tihah vote thum a tla bawk. July leh August thla tira ngaihdan lakah khan thlawptu hi paruk an awm a, mahse, poll hnuhnung berah a tlahniam leh ta a ni. UN Trade and Development body hotu nilai Costa Rica hruaitu Rebeca Grynspan chuan poll thar berah hian thlawptu a ngah ber a, Carolyn Rodrigues-Birkett chuan a dawt a ni.

Security Council-in UN secretary general thar tura a rawt ni tur hian member ram 15 zingah thlawptu pakua an awm a ngai dawn a, hei bakah permanent member ram panga - China, France, Russia, United Kingdom leh United States ramin an veto loh a ngai dawn bawk.