Greenland security-ah Denmark leh US in inremna siam
US leh Denmark chuan Greenland security chungchangah inremna an siam tih an puang. Denmark semi-autonomous territory-ah hian US chuan security leh a mamawh dang zawng zawngah thuneihna a nei dawn a ni.
Ram pahnih hruaitute chuan inremna siam chu Denmark security thuam chakna tur ani tiin, tun karah an ziahfel theih an beisei thu an sawi. Mahse, an inremna siam dan kimchang erawh an tarlang lo. NATO pawhin he inremna hian Greenland boruak ṭha leh ngelnghet siamna kawngah a pui thei dawn tih a sawi ve bawk.
US president Donald Trump chuan a hmain Greenland chu security chungchang leh, a ram hausakna awmte chhuanlamin US in lak a tum thu sawiin a lo vau tawh a ni. He a thusawi hian sawisel pawh a hlawh hle a, mahse Denmark nen inremna an siam leh thei a ni. Trump chuan inremna an siam hmang hian US chuan Greenland himna leh boruak ṭha a awm theihna tura thil ṭulte a ti thei dawn a ni, a ti. An phalna loin Greenland-ah ngaihven zui ngai tak investment pawh tih theih a ni lo ang, tih a sawi.
Denmark prime minister Mette Frederiksen chuan inremna an siam thei chu lawmawm a tih thu a sawi a, tunkara UN General Assembly neih turah an ziahfel theih a beisei tih a sawi. Greenland prime minister Jens-Frederik Nielsen nena thuchhuah inṭawm an siamah, "Inremna hian Arctic leh North Atlantic biala venhimna kalpui kan duh dunna te a tichak dawn a, hemi rual hian Denmark ram rorelna kawnga a thuneihna chin pawmin, Greenland mipuite dikna chanvo pawh a zahsak dawn a ni," a ti.