Houthi helpawlin Saudi khawpui an bei

Yemen rama Iran thlawp helpawl, Houthi chuan Inrinni liam ta khan drone leh missile hmangin Saudi Arabia khawpui, Riyadh an bei.

Houthi hian July thla aṭang khan Saudi Arabia hi bei fo mah se, an khawpui tak hi an la bitum tel ngai lo. Riyadh-ah hian khawi hmun tak nge an target tih an sawilang lo a, mahse Yanbu-a Saudi oil export hub, Aramco facility chu an beih zingah a tel. Hei hi Yemen khawpui, Sanaa beih a nih avanga an chhan letna niin an sawi.

Saudi kaihhruai Arab ṭangrual sipaite chuan Houthi missile kah chhuah hi an an air defenec hmanga an lo tihchhiat thu an sawi. Thuchhuah an siamah, Houthi ten Saudi chhim thlang lama Bish leh Farasan khawpui leh, khawthlang lama Taif khawpui beih an tumna bakah, Red Sea kama Yanbu-a civil mite beih an tumna chu an lo dang thei tih an sawi bawk. Heng khawpui beihnaah hian thil tihchhiat a awm em tih erawh an sawilang lo.

Saudi civil defence chuan Houthi ten an beih hma hian Riyadh leh khawchhak lama an khawpui, Al-Kharj ah alert an tichhuak a ni. US State Department pawhin Inrinni khan Middle East-a America mi awmte tan alert a tichhuak bawka, fimkhur tura chahin an mi leh sate pawh Middle East-a zin rih lo turin a chah.

Houthi pawl hian Yemen hmar lam bial hmun tam zawk an thunun a, Saudi Arabia hian Yemen sorkar a thlawp vangin a kaihhruai Arab ṭangrual sipaite nen pawh a hmain an lo inbei fo tawh a ni. Turkey chuan Houthi ten Saudi an beih tak fo avangin Saudi chuan sipai lama puihna a mamawh maithei tawh niin a sawi a, eng ang puihna nge an pek dawn erawh a la sawichiang lo. Saudi Arabia, Turkey leh Pakistan chuan defence lama inpuih tawnna tur inremna chu August thla khan an lo ziak tawh a ni.

Iran Supreme National Security National Council secretary, Mohsen Rezaei chuan Saudi Arabia leh Houthi te inbeihna chu tawp tawh se a duh thu sawiin, Yemen pawhin Saudi nena inrem ṭha taka awm a duh a rin thu a tarlang.