Bangladesh-ah sentut vangin naupang 1,000 chuang thi tawh

Bangladesh-ah kumin chhungin sentut natna vangin naupang 1,000 chuang an thi tawh. Sorkarin emergency vaccination campaign a kalpui chungin hri kai hi an la pung zel a ni.

Ram chhunga naupang mtd 19.8 te chu vaccine pek an ni tawh a, mahse nitin hri kai thar hi 1,000 dawn an la awm thar reng a ni. Sorkar chuan vaccine la lo naupangte hnenah vaccine hi pek kim vek an nih theihna turin nasa zawkin hma a la dawn tih a sawi.

Kumin March thla thleng khan Bangladesh hian sentut umbona kawngah hma a sawn hle niin World Health Organisation (WHO) chuan a lo sawi tawh a ni. Mahse, WHO data thar berah chuan ram dang zawng aiin sentut hri kai hi Bangladesh-ah a tam tawh zawk. Sorkarin a tarlan danin, March thla aṭang khan sentut kai hi mi 194,000 chuang an awm leh tawh. WHO chuan hri umbona kawnga hma lakna chu hlawhtling viau mah se, vaccine campaign kalpui hian naupang tam tak a thleng phak lo niin a tarlang.

Bangladesh chauh hi sentur hri len thar lehna a ni lo a, mahse, ram dangah erawh a nasa lo thung. UK-ah pawh sentut hri an umbo tawh nia sawi a nih laiin, kumina he hri vei hmuh chhuah an awm leh. US-ah pawh hri kai hmuh chhuah thar an awm chho leh tawh a ni.