France-in social media khap rawtna siamṭhat theh lut

France sorkar chuan kum 15 hnuai lam tana social media khap rawtna a siam hmasa chu Constitutional Council in a hnawlsak hnuah, nimin khan rawtna siam thar chu European Commision hnenah an theh lut ṭha leh tih president Emmanuel Macron chuan a sawi.

Constitution Council chuan sorkarin naupang tana social media khapna siam a tum chungchangah, a dan siam ṭhenkhat chu freedom of expression bawhchhiatna a tel tih sawiin, August thla laihawl khan a lo hnawlsak tawh a ni. Hemi chungchang hi hriattir an nih hnuah, president Macron chuan Constitution Council pawm theih tur leh, EU dante zawm chunga ruahmanna siam turin prime minister Sebastien Lecornu chu a ruat leh a ni.

Macron hian naupang leh tleirawlte rilru lam hriselna venhimna atan social media khap chu a ngaih pawimawh zingah a tel thu a lo sawi fo tawh a, he khapna hi nakkkuma a terma tawp hma ngeia hman a nih theh a beisei thu a sawi. European Union pumah pawh hetiang dan hi siam tura a duh thu tarlang a ni.

EU hotu, Ursula von der Leyen chuan tunkar hian Brussels-a thu a sawi dawn a, hemi hunah pawh naupangte tana social media khap chungchang hi sawi dawn a ni. Ram eng emaw zat chuan social media-in naupangah nghawng ṭha lo a neih dante thlirin, khapna leh khuahkhirhna siam turin hma an la mek bawk.