Israel-in Lebanon-a Hezbollah underground complex kap chhia

Israel sipaite chuan Lebanon chhim lam, Ali al-Taher ridge-a Iran thlawp helpawl, Hezbollah underground infrastructure an kap chhia tih an sawi. Prime minister Benjamin Netanyahu leh defence minister Israel Katz-te chuan hei hi nem nghetin, Hezbollah indin thar lehna tur dang turin helai bialah hian Israel sipaite chu an awm chhunzawm zel dawn tih an sawi nghal bawk.

Ali al-Taher ridge hi Israel ramri aṭanga km 15 vela hla a ni a,Lebanon-a Israel leh Hezbollah te inbeihna nasatna hmun zingah a tel. Hezbollah hian he hmunah hian underground command centre bakah ralthuam dahkhawmna tur hmun an siam nia an hriat thu Lebanon security lam chuan an lo sawi tawh a ni.

Lebanon state news agency, NNA chuan Israel-in ridge a bei thawm leh a nghawr hi a chhehvel bialah pawh a hriat theih tih a tarlang.

Israel sipaite chuan ridge-ah hian lei leh leihnuai lam thlengin an thunun tawh tih sawiin, lei hnuaiah hian helpawl hi km 2 chuanga thuiah an inzarpharh a, rocket, misile leh drone pawh eng emaw zat an neih bakah anti-tank missile, mine leh puak theih thil dangte pawh a awm tih an sawi. Sipaite chuan Hezbollah-a Badr unit central command complex awmin, hetah hian command centre, ralthuam dahkhawlna leh chenna tur quarters-te pawh a awm tel vek a ni.

Kumin March 2 aṭang khan Israel hian Lebanon chhim lama Hezbollah hmunte a bei a, an hmun pawimawh eng emaw zat an laksak tawh.