Philippines-ah lawnga kangmei chhuakah mi 5 an thi

Philippines khawthlang lam, Palawan thliarkar tuipuia khualzin phur lawngah an ram huna Nilaini zan dar 7 rik hma deuhin kangmei a chhuak a, mi panga an thih bakah chin hriat lohin mi 80 chuang an awm.

Kangmei chhuahna lawng hi MV June Aster a ni a, Manila aṭanga chhuakin khualzin leh thawktu 134 an chhuang a, khualzinten an tlawh nasat hmun, Coron pana kal a ni. Coastguard captain Noaemi Cayabyab chuan mi 43 chu him taka chhan chhuah an ni tawh tih nimin khan a sawi. Kangmei hi bungrua an dahna hmun aṭanga chhuak a ni a, rei loteah hmun dangah a darh a ni.

Philippine Coast Guard (PCG) chuan lawng eng emaw zat hmangin chin hriat loha awmte zawn hna hi thawh mek a nih thu a sawi. Phillipines hi thliarkar 7,600 awmna a nih avangin inkalpawhna atan lawng an hmang tlanglawn ber a, hei vang hian lawng chetsualna pawh a thleng ngun hle.