Spain intelligence service-in Ceuta-ah luh tum chungchang hriattir lawk

North Africa tuipui kama Spain thuneihna hnuaia awm, Ceuta khawpuia July thlaa mi tam tak ramri kaltlanga an luh hma khan, Spain intelligence service chuan Morroco hnenah hemi chungchang hi a lo hriattr lawk tih tarlan a ni.

Nilainia sorkarin document a tihchhuahah, July 29 khan Spain spy agency, National Intelligence Centre (CNI) chuan Morocco intelligency agency - DGST leh DGED hnenah Morocco-in national Throne Day lawmna hun an hman chu remchangah hmangin, an ramri kaltlangin Ceuta-ah tuipui leh khawmual lam aṭangin mi tam takin luh an tum tih an thil ruahmante hi social media lamah pawh an tarlang tih a hrilh a ni. Hemi chungchang hi WhatsApp message hmangin Ceuta-a Spain sorkar aiawhte pawh an hrilh bawk.

July thla tawp khan Morocco ramri kaltlangin Ceuta-ah hian mi 72,000 vel an lut a, a tam zawk chu thawn kir leh ni mah se tun thlengin pem lut zinga mi 5,000 vel chu an la awm chhunzawm tho a ni. Hetih lai hian tualchhung official-te chuan pem lut la awm hi mi 10,000 dawn an la tling niin an sawi.

Mi sing tel a ruala Ceuta khawpui an luh chungchangah, eptu pawl chuan Spain sorkar chu hriattir lawk a ni chungin hma engmah a la lo niin an puh. Engkim an hre lawk vek a, hei vang hian buaina thlengah pawh mawh an phur a ni, a ti.

Ceuta khawpuiah hian mi 84,000 vel an cheng a, an khaw mipui awm zat dawn lut an awm avang hian an buai phah hle a ni. Spain sorkar chuan he khawpuia cheng, in leh lo nei lote ṭanpui leh chhawmdawlna turin USD mtd 357 pek a nih tur thu a sawi.