Hnathawktute nawrh vangin Eiffel Tower khar

Khawvel huapa hmun hmingthang, khualzinte an tlawh nasat, France khawpui Paris-a Eiffel Tower chu hnathawktute nawrh vangin Thawhṭanni khan khar a ni. Nawrh huaihawt chhan hi Hindu sakhaw pawl pakhatin Eiffel Tower an tlawh laiin hmeichhe hnathawktute thiarfihlim tura thupek an nih vang tih hnathawktute leh management lam chuan an sawi.

Inrinni liam ta khan Eiffel Tower hi Hindu sakhaw pawl, Bochasanwasi Akshar Purushottam Swaminarayan Sanstha (BAPS) mi leh sa 100 velin an tlawh a ni. He hmun an thlen hian hmeichhe hnathawktute chu kalsawn tura hrilh an ni tih staff union aiawh, Diane Davoine-i chuan a sawi a ni.

"Heng miten an tlawh chhung hian, hmeichhe hnathawktute chu an hmunah mipa dah an nih theih nan an hnathawhna hmun kalsan tura hrilh an ni," tiin, Davoine-i chuan he thil thleng chungchangah hian management lam chuan hnathawktute hnenah ngaihdam an dil tawh tih a sawi bawk.

"Hnathawktute, a bik takin hmeichhiate tan he thil hi thil pawm harsa leh lawmawm lo tak a ni.Thil thleng leh an laka chet dante kha a tlawm thlak hle a ni," a ti. Hnathawktute hi inhmukhawmin, he thil thleng chungchangah management lam nen inbiakna neih a nih nan leh, hetiang thil hi a thlen nawn tawh lohna turin nawrh huaihawt an rel tih a sawi.

Eiffel Tower enkawltu company, Société d'Exploitation de la tour Eiffel (SETE) chuan Hindu pawl aiawhte hian an tlawh chhungin hmeichhiate nena inkalpawhna leh inbiakna titlem tura ruahmanna siam turin an lo ngen ngei a ni tih a nemnghet a; an thil phut hi lo pawmsak miah loh tur a nih thu a sawi bawk. Thil thleng kha SETE kalphung leh ngaihdan nena inmil lo a nih bakah, mipa leh hmeichhia intluktlanna kalphung nena inrem lo a nih thu a tarlang.