Ramkang leh khawlumin boruak thianghlimna leh hriselna a tibuai thei

United Nations hnuaia khawchin leh sik leh sa zirtu, World Meteorological Organization (WMO) chuan ramkang leh khawlum lutuk chuan khawvel huapa boruak thianghlim siam tura hmalakna te, mihring hriselna venhimna leh leilung humhalh hnate an tikhawlo thei a ni tih a sawi.

WMO chuan boruak bawlhhlawh leh sik leh sa inthlak danglam, climate change inkungkaihna tarlangin; scientist-te sik leh sa inthlak danglamna hian khawlum lutuk leh ramkang a thlen zingin a tichak zual tih an report-ah an tarlang. "Ramkang rapthlak tak takte a pun zel avangin, a meikhu nasa tak hian hriselnaah nghawng ṭha lo tak a thlen a ni," an ti.

Europe leh North America-ah chuan industry leh lirthei aṭanga PM2.5 chhuak tihniam turin dan khauh tak siam a ni tawh a, mahse ramkang vanga boruak bawlhlawh erawh a pung thung a ni. Hetiang boruak bawlhhlawh hi hmun tinah darh tawh mah se, vil tawk an ni lo a, nungcha leh thilnung dangte chenna tan pawh an hlauhawm thei hle a ni tih WMO chuan a sawi bawk.

Boruak thianghlimna leh sik leh sa inthlak danglam (climate change) hi a hranga chin fel hleih theih an ni lo. Pakhat a chhiat chuan a dang pawh a chhe ve zel a ni," tiin WMO-a Global Atmosphere Watch network-a scientist, Lorenzo Labrador-a chuan a sawi. WMO chuan 1990 chho aṭang khan khawvel huapin ramkang meikhu thlen dan hi a let thumin a pung tawh. Kum 2010 leh 2018 inkar khan kum tin mi 100,000 vel thihna a thlen belh a ni.