Bangladesh eptu party-ten nawrh huaihawt

Bangladesh rama energy leh gas tlakchhamna thleng mek vanga lungawi lohna lantirin, kar liam ta Inrinni khan eptu party huaihawtin ram pumah kawng zawh buatsaih a ni a, tel an ṭhahnem hle.

Prime minister Tarique Rahman-a kaihhruai sorkar hi thla ruk liam taa lak luh a ni a, tun ṭum hi sorkar thar laka lungawi lohna lantirna lian tham ber a ni.

Dhaka-a pungkhawmte chuan sorkar laka an lungawi lohna thute an aupui a, Chittagong port city an pan a, an kawng kalna turah hian rally eng emaw zat neih tura ruahman a ni bawk. Eptu hruaitu, Shafiqur Rahman chuan "He kan chetna hi eirawngbawlna gas a awm leh theih nan leh, in tina electric supply kan neih theih nana ti kan ni," a ti.

West Asia buaina a thlen hnuah, Bangladesh hian energy leh natural gas lamah harsatna a tawk mek a, sorkar chuan an harsatna chingfel tur hian hma a la mek niin sawi mah se, mipuite chuan sorkar hma lak dan an duhkhawp lo hle. Zirlai pakhatin electric bill sang lutuk vanga a lungawi loh thu a sawi chhuahnaah, sorkar mi pawimawhte a sawichhia nia puh a nih avangin man a ni a, he thil thlen tukah rally hi huaihawt a ni zui a ni. Zirlai man a ni hi sorkarin duh lohna lantirtute laka dawhtheihna a neih loh zia lantirtu a ni tih eptute chuan an sawi.

"Gas, electric leh leiṭha in pe chhuak thei lo a, mipuiten an duh lohna an sawi chhuah in phalsak lo bawk A nghawng hi a na khawp ang," tiin eptu party National Citizen Party hruaitu Akhter Hossen-a chuan mipui pungkhawm hmaah a sawi a ni.