Indonesia-a ram kang chungchangah company 19-te chhui chiang mek

Indonesia rama Sumatra leh Kalimantan-a ram kang nasa tak chhuah chungchanga inrawlhna nei nia sawi, company 19-te chu sorkarin a chhui chiang mek. Hei hi ram kang nasa zual tur venna atana sorkar hmalakna pakhat a ni.

Environment Ministry-a official senior Rizal Irawan-a chuan chanchinbu mite hnenah satellite hmanga an thlirnaah company 42-te hmun chu ram kang chhuahna hmun ni thei turin a lang a ni, tiin a sawi. Ram kang hi palh nge tih luihna vanga chhuak tih an chhui dawn a ni. "A chhan chu engpawh ni se, company-te hmun neih chhungah ram a kan chuan, mawhphurhna khauh tak an hmachhawn zel ang," tiin Rizal-a chuan a sawi. Company 23 dang, ram kan hlauhawmna hmuna hmun nei mekte pawh chu chhui tel an ni bawk ang. Company hmingte leh an hna thawhte erawh a sawi lang lo.

July thla chhung khan Indonesia-ah hian ram hectare 95,000 vela zau a kang. Province pasarih-a company 19-te enkawl ram chhungah ram kang hi hectare 11,047 a zau a tling a ni. Hun rei tak chhung ram nasa taka a kan tawh avangin ram kang khu hi mihringte chauh ni lo, an rama nungcha awmte tan pawh thawkna lama harsatna thlen thei a ni tawh tih an sawi. An ṭhenawm ram, Malaysia leh Philippines te chu meikhu hian a bawh nasa hle a ni.