Imran Khan leh a nupui khung hrang lo turin hriattir

Pakistan High Court chuan jail thuneitute hnenah an ram prime miniter hlui, Imran Khan leh a nupui Bushra Bibi-te chu an tanna hmunah mi dang tlawh pawh theih loha mal taka khung hrang lo turin a hriattir.

Kum 73 mi, Khan leh nupui Bibi-te hi eirukna leh thil dang kaihhnawih vanga hremna rei tak hmachhawnin Rawalpindi-a Adiala Jail-ah an tang mek a ni. Jail chhunga mal taka dah an nih chungchanga petition theh luh chu Islamabad High Court (IHC) Justice Khadim Hussain Soomro chuan ngaihtuahin, thupek hi a tichhuak a ni. Khan-a farnu Aleema Khanum leh Bibi-i fanu Mubashra Khawar Maneka-te chuan mal taka hren, solitary confinement an nih chungchangah lungawi loin, court-ah an chungchang hi ngaihtuahsak tura dilna hi an theh lut a ni.

Court chuan jail danin a phal angin Khan-a chhungte chu amah tlawh phalsak turin a ti a, a fapate nena telephone-a an inbiak theihna tura ruahmanna siam turin thuneitute a hrilh bawk. Adiala jail thuneitute hnenah hian nitin chanchinbu leh lehkhabu pe tur leh, jail dan ang zela hriselna lama enkawlna an dawnna turin ruahmanna siam turin a ti bawk.

Adiala jail superintendent chu court thupek hi a taka bawhzui a nih leh nih loh enfiah tur leh, ni 15 chhunga report theh lut turin hriattir a ni.

PM hlui Khana hi August 2023 aṭang khan jail-ah dah a ni a, a nupui Bibi hi January 31, 2024 khan eirukna kaihhnawihah thiam loh chantirin tan tir a ni bawk a, hemi hnu October 24-ah chuan bail-in a chhuak a, mahse January 17, 2025 khan case dang vangin man leh niin, tun thlengin Adiala Jail-ah hren la ni ve bawk.