US Army Secretary Driscoll-a'n banna theh lut

US Army secretary Dan Driscoll chuan banna a theh lut a, hei hi defence secretary Pete Hegseth nena an inkar boruak ṭhat loh vang nia sawi a ni. Thawhṭanni khan White house chuan banna a theh luh thu hi a nemnghet.

Driscoll hi vice president J.D. Vance-a law school kalpui ṭhin a ni a, an inṭhianna avang hian sorkar lamah pawh duhsakna dawng ṭhin anga sawi a ni. Mahse, Hegseth-a nen erawh an inkar a ṭha lo hle.

Senate-a Armed Services Committee-a Democrat hruaitu, Jack Reed chuan Driscoll banna chhanah Defence Secretary a puh a, a lawm lo hle tih a sawi. President Donald Trump chuan Pete Hegseth-a'n Defense Department a tihchhiat nasat zia a hriat a hun tawh a ni, a ti. Hegseth hian April thla khan Army Chief of Staff General Randy George chu a lo ban tawh a, tun thlengin a thlaktu tur nghet a la ruat lo a ni.

Driscoll hi sipai hlui niin, Iraq-ah pawh a lo awm tawh a ni. Kum 2020 khan Congress inthlanah chuhin a tling lo a, kum 2024-a US President thlanna neihah khan Trump campaign-ah advisor a lo ni tawh bawk.