Trump-a'n Lake Ontario hming 'Lake America' tiin thlak

US president Donald Trump chuan Ningani khan Lake Ontario hming chu "Lake America" tiin a thlak. Hei hian ram pahnihten insumdawn tawnna kawnga boruak ṭha lo an neih mek chu a tihzual phah rin a ni.

North America-a dil lian panga zinga pakhat, Lake Ontario chungchanga Trump thupek tihchhuahah Lake America tih hi US sorkarin a hman dan tur a ni a; Canada sorkar emaw, khawvel huap pawl hrang hrang leh pawl dangten he dil hming an sawi dan tur erawh a huam tel lo.

Trump thupek tihchhuah hi Canada prime minister Mark Carney leh New York State governor Kathy Hochul te chuan sawisel nghalin he dil hming hi Lake Ontario tia kum 400 chuang lo sawi tawh chu thlak an tum lo tih an sawi.

Lake Ontario zau zawng 52% vel hi Canada ram chhungah a awm a, a bak zawng chu New York-ah a awm thung a ni.

Quebec-a Wendat Nation hruaitu, Grand Chief Pierre Picard pawhin dil hming thlak a ni chu a dem thu a sawi. Ontario hi Wendat ṭawng atanga lo chhuak a ni a, 'dil mawi leh ropui' tihna a ni."President Trump hian kan chanchin leh hmanlai thil nuaibo a tum a ni," tiin a thin a urin a rilru a na hle tih a sawi.