Algeria ram kang vangin mi 12 an thi

Algeria hmarchhak lama ram kang vangin Nilaini khan mi 12 an thi a, mi tam takin hliam an tuar bawk tih Interior Minister leh Civil Protection thuneituten an sawi.

Ram kang thlenna hmun hi Bejaia province khawpui, Algiers aṭanga kilometre 300 vela hla-ah a ni. Interior minister Said Sayoud chuan ram kanga vanga thite hi Jijel province-ah mi panga, Bejaia-ah mi pali leh Tizi Ouzou province-ah mi pathum an ni tih a tarlang. Bejaia damdawi-inah mi 54-te chu an kang hliam avangin enkawl mek an ni bawk a, an zinga paruk chu an dinhmun a ṭha lo hle tih nia sawi a ni.

Sayoud-a leh health minister Mohamed Seddik Ait Messaoudene-te chu ram kang ṭhelh hna thawh mek leh, chhiatna thleng vanga hliam tuarte dinhmun enfiah turin Bejaia-ah an kal nghal a ni. Bejaia leh Jijel-a cheng mi tam tak chu an chenna hmun aṭanga sawn chhuah an ni tawh bawk.

Nilaini zan thlen khan kangṭhelhtute chuan hmum 69-a ram kang chu ṭhelh mih tumin an bei chhunzawm. Civil protection agency chuan thli a nat avangin mei a kangkai chak a,ṭhelh mit tur hian hmanrua tam tak an hman thu an tarlang. Algeria hmarchhak lamah hian nipui laiin ram kang hi a thleng fo thin.

Bejaia, Jijel leh Setif khawpui bula ram kang vang hian khaw chhak lama kawngpui pawimawh pathum chu khar a ni tih police-te chuan an sawi. Nikum July thla khan Bejaia chhehvela ram kang vang hian mi 30 chuang an lo thi tawh a, ram tam tak leh in sang tel a lo kang chhe tawh a ni. Kumin July thla chhung khan ram pumah hmun 2,000 velah ram a kang bawk.