Pakistan-a damdawi-in kangah nausen 14 an thi

Pakistan khawpui Islamabad-a sorkar damdawi-in lian pakhatah nimin zing khan kangmei a chhuak a, nausen 14 an thi tih thuneituten an sawi.

Kangmei chhuahna hi Pakistan Institute of Medical Sciences (PIMS)-a chhawng thumna, nu leh nausen enkawlna gynaecology ward a ni. Kangmei chhuah lai hian ward-ah nausen pianghlim 15 an awm a, nausen pakhat chu doctor-in a chhan hman tih PIMS thupuangtu, Dr Aneeza Jalil chuan a tarlang.

Thuneitute chuan chhiatna thlen hnu hian chhanhimna hna thawktute chu a hmunah hian an thleng nghal tih a tarlang a, kangṭhelh lirthei paruk leh ambulance pali an thawk chhuak a ni. Kangmei chhuak pawh an thlen hnu lawkah an thunun thei nghal niin an sawi bawk. He thil thlen dan chhui chiang tur hian additional deputy commissioner general kaihhruai committee din nghal a ni bawk.

PIMS thupuangtu Jalil chuan zing dar 7 velah kangmei hi a chhuak tih a sawi a, electric short circuit vanga chhuak nia a lan thu a sawi.

Pakistani prime minister Shehbaz Sharif chuan damdawi-ina chhiatna thleng chu pawi a tih thu leh, nausen thi chhungte a tawrhpui thu a sawi. Chhiatna thlen dan chu uluk leh rang taka chhui chiang tura thuneitute a hriattir thu a sawi. He damdawi-in hi tun hnaia jail-a tang mek, prime minister hlui Imran Khan hriselna dinhmun enfiah tura an hruaina hmun kha a ni.