Netanyahu-a'n Iran-in a fapa thah an tum niin sawi

Israel prime minister Benjamin Netanyahu chuan Iran-in a fapate zinga pakhat thah an tum tih a sawi a, mahse engtikah leh khawi hmunah nge a nih tih leh, a fapate zinga tu ber nge an tum tih erawh a sawi chiang lo.

Jerusalem Post-in a tarlan danin, Netanyahu hian Iran-in a fapa thah an tum thu hi Channel 14 nena phone-a an inbiaknaah a sawi a ni. Netanyahu chuan, "Hei hi thil thleng mak tak a ni. Iran hian ka fapa thah an tum, ka fapate zinga pakhat thah an tum a ni," a ti.

Netanyahu hian fapa pahnih leh fanu pakhat a nei a, July thla khan Israel thuneitute chuan a fapa pahnih leh a nupui chu venhimna hun rei zawk atan an lo pe tawh a ni. A fapa upa zawk, Yair chu kum 2024 tir aṭang khan US khawpui Miami-ah a cheng reng a; a venhimna man atana mipui chhiah hman a nih avangin Israel-ah sawisel a hlawh hle.

Hetih lai hian, Iran chuan Israel leh US-in Iran an beihnaah an supreme leader,Khamenei leh a chhungte thah an nih avangin phuba lak ngei an tiam ve thung. Khamenei fapa, Mojtaba chu Ali Khamenei a thih hnu kar khatnaah Supreme Leader thar atan ruat a ni. Mojtaba Khamenei hi a hna thar a chelh hnu hian mipui hmaah a la inlan lo a, a pa vui ni puala thuchhuah a siamah chuan, Supreme Leader hlui thihna avanga phuba a lak tur thu a sawi a ni.