New Zealand-in kum 16 hnuailam tan social media khap tum

New Zealand sorkar chuan Thawhṭanni khan kum 16 hnuailam tan social media hman khapna dan thar a pharh. Ram dang eng emaw zat chuan social media laka naupang venhimna tur hi ngaihtuahin hma an lo la tawh hlawm a ni.

Australia chuan nikum December thla khan khawvel ram hrang hrang zinga a hmasa ber ni turin naupangte social media hman khapna dan a lo kengkawh tawh a; UK, France leh ram dangten an hmang zui ve leh bawk.

New Zealand dan siam thar hnuaiah hian, he dan zawm lo social media company-te chu khawvel pumpuia sum lak luh aṭanga 10%chawitir tura hrem theih an ni ang.

Prime minister Christopher Luxon chuan New Zealand naupang, ṭhangtharte chunga thil pawi thlengtur chu an pawm thei tawh lo tih sawiin, "Kum 13 leh 17 inkar naupang pathum zinga pakhat hian nitin social media-ah darkar nga aia tam hun an hmang a ni," a ti. "Social media hian thil hlauhawm leh ṭha lo tak takte awmin, naupangteah an hmachhawn thiam loh khawpa nasaa nawrna a awm a ni. Hei hian an chhungkaw nun, an rilru hriselna, an mut leh an zirnate nasa takin a khawih pawi a ni" tiin a sawi. Luxon-a chuan Instagram, TikTok, Snapchat leh Facebook-te hming pawh sawilangin, platform-te hian hmangtute kum 16 an tling ngei em tih enfiah nan hmalakna awmze nei tak an neih a ngai dawn tih a sawi bawk.

Hetihlai hian he bill hi National Party thawpuitu, ACT party leh NZ First party-ten an duh loh thu an lo sawi tawh a, hei vang hian an pass thei angem tih erawh a la hriat loh a ni. NZ First party chuan Australia-a khapna dan hman chu a hlawhtling lo hle nia sawiin, hei vang hian an rama khapna dan lo siam ve pawh chu an thlawp lo niin an tarlang. Eptu party lian ber, Labour party pawhin thutlukna an siam hmain dan siam dan tur chungchanga sorkar chhan turin zawhna eng emaw zat an theh lut bawk a ni.