Indonesia police-ten ram tikangtu nia rinhlelh mi 72 man

Indonesia police-te chuan Pathianni khan ramngaw haltu nia rinhlelh mi 72 an man. Indonesia ram laili leh khawthlang lamah ram nasa taka a kan avangin meikhu hlauhawm tak, thawk tinuam lo a chhuah phah a ni.

Indonesia National Disaster Management Agency (BNPB) sawi dânin, El Nino leh khua a ro rei avangin ram kang hi a nasa hle a, meikhu chhah tak hian Malaysia ram a thleng pha niin an sawi. Ram kang vang hian hi Indonesia chuan harsatna a tawh phah fo a, an ṭhenawm ramte nen pawh an inlaichinna a chhe fo ṭhin.

National Police’s Criminal Investigation Agency-a special crimes director, Mohammad Irhamni chuan huan leh lo neituten mei hi a tichhuak fo niin a sawi a, Borneo thliarkara province panga leh Sumatra-a province palia ram kang thleng chungchangah case 89 chhui zui mêk an ni tih a sawi bawk.

Irhamni chuan an mi mante hi sum tlawm zawka huan siam nâna ram chu tikang luiah puh an ni tih a sawi. Hetianga ram tikangtute hi company lamin an tirh nge, sum hmanga an ṭanpui tih pawh hriat tuma chhui mek a ni. Mi dang pawh man belh an nih a rinawm.

Pathiannia Jakarta-a chanchinthar lakhawmtute a kawmnaah, Irhamni chuan, "Ram tikangtute chauh ni lo, he thiltih aṭanga hlawkna hmutu leh a phena inrawlh awmte kan chhui chhuak ang," a ti. Rinhlelh mante hi thiam loh chantir an nih chuan pawisa tam tham tak chawitir leh, kum 15 thleng lung-in tantir theih an ni ang.

Indonesia president Prabowo Subianto chuan Inrinni khan Central Kalimantan province, ram hectare 7,600 aia zzau kanna hmun a tlawh a, thuneitute chu meikhu chhah tak thunun turin a fuih.

Prabowo chuan ram kang ṭhelh mih a nih theihna atan sorkar bungrua leh hmanraw mamawh - helicopter leh tui pump-te pawh pek a tiama a, ram kang thlentu company-te chu hremna pek ngei a tiam bawk.