Thailand leh Myanmar sipai hotuten meeting nei

Thailand khawpui, Bangkok-ah Ningani khan Thailand leh Myanmar hotuten High-Level Committee meeting an nei. Meeting-ah hian Myanmar commander-in-chief, general Ye Win Oo leh Thailand chief of defence forces, Ukrit Boontanon te an tel.

Ram pahnih sipai hotute inbiaknaah hian ramri, km 2,400 vela thui biala himna lama thawh dunna tihchangtlun chungchang chu an thupui bera an neih a ni. Ruihhlo tawlh leh internet hmanga inbumna, cyber scam danna tura thawh ho, firfiak beihna lama sipai thawh hona, training, leh chhiatrupna thlen laia ṭanpuina pek chungchangte an sawi ho bawk. Ram kang leh lui tui tihbawlhhlawh a nih dante pawh an sawi tel bawk. Thai general chuan Myanmar sipai hotu hnenah boruak thianghlim leh thianghlim loh endikna khawl a hlan nghal bawk.

Kum 2023 khan Myanmar-ah ram pahnih sipai hotuten inbiakna an lo nei tawh a, hetih lai hian tuna president ni ta, Min Aung Hlaing-a chu sipai hotu lu ber a ni.

Myanmar sipai sorkara spy hotu hlui, Ye Win Oo hi kum 2021-a sipai chakna hmanga civil sorkar thuneihna hnehchhuh a nihnaah khan mawhphurhna a neih avangin US bakah ramdang eng emawa zatin a laka hrekna an siam a ni. Sipaiten thuneihna an chan hnuah, kumina inthlanpui buatsaih sipai thlawp party-in sorkar thar siamin, Min Aung Hlaing chu sipai hotu a nihna aṭanga bangin civil sorkar an siamah President atan lak luh a ni. Hetih lai hian ram tam tak chuan Myanmar sorkar thar hi an civil sorkar angin an la pawm hlawm lo. Thailand hian Myanmar nen ramri thui tak an inṭawm avangin, an inkar boruak pawh siamṭhat tumin hma a la mek a, hei vang hian campaign group Special Advisory Council for Myanmar sawisel pawh a hlawh hle.