North Korea-in nuclear ralthuam 120 a nei tling niin chhut

South Korea chuan a ṭhenawm, North Korea-in nuclear warhead 80 - 120 inkar a nei nia a chhut thu an Defence Minister chuan nimin khan a sawi. Hetih lai hian US president Donald Trump chuan NKorea nuclear ralthuam neih zat hi 57 niin a sawi thung.

Defence minister Ahn Gyu-back chuan lawmaker-te hnenah North Korea hian warhead 80 aṭanga 120 vel a nei tura ngaih a nih htu leh, a zat chiah sawi erawh a harsa tih a hrilh. A zat hi zirchiangtu pawlte chhut dan a nih thu tarlangin, South Korea sipai lam chuan a zat chiah hi official-in an nemnghet thei lo tih a tarlang. SKorea hian NKorea-in nuclear ralthuam a neih zat hi chiang takin mipui hmaah a sawilang ngai lo. Nuclear ralthuam tihbo, denuclearization a thlawp avangin NKorea hi nuclear ralthuam nei ram angin a la pawm ngai lo bawk.

SKorea hian hemi chungchang hi Trump leh NKorea hotu Kim Jong-un ten inbiakna neih leh an tum nia sawi a nih hnuah an tichhuak a ni. Trump hian US-SKorea joint military exercise neih pawh NKorea tana huatawm tak a nih theih avangin titlem turin a lo hriattir tawh a ni.